13 Dic Galicia Suroeste e Redondela avanzan cara a un futuro sostible coa rexeneración integral da enseada de San Simón
Cun investimento de máis de 18.000 euros financiados ao abeiro do PSTD ‘A Despensa de Galicia’ realizaranse melloras na contorna para protexer e adaptar este espazo ao escenario de cambio climático
A enseada de San Simón, un dos tesouros naturais de Galicia incluído na Rede Natura 2000, protagonizará unha transformación estratéxica para a prevención de danos ao ecosistema deste espazo natural protexido como consecuencia das inundacións provocadas polo cambio climático. Galicia Suroeste e o Concello de Redondela veñen de asinar un convenio de colaboración para levar a cabo o proxecto de rexeneración e mellora dos ecosistemas dunares, intermareais e do esteiro desta contorna, levando a cabo accións cruciais para protexer este enclave único.
A iniciativa contará cun investimento de máis de 18.000 euros financiados de forma íntegra por Galicia Suroeste ao abeiro das inversións para a adaptación ao cambio climático e prevención e xestión de riscos específicos dos territorios de costa do Xeodestino, que se enmarca na liña de transición verde e ecolóxica do Plan de Sostibilidade Turística en Destino (PSTD) ‘A Despensa de Galicia’ no marco do Plan de Recuperación, Transformación e Resiliencia financiado pola Unión Europea con fondos Next Generation EU.
A presidenta de Galicia Suroeste, Sandra González, destacou a importancia de proxectos como este, co que “non só reforzamos a nosa aposta pola preservación ambiental, senón que poñemos en valor o noso patrimonio natural, impulsando un turismo respectuoso co medio ambiente. Unha relevancia na que tamén incidiu a alcaldesa de Redondela, Digna Rivas: “A enseada de San Simón é un legado ambiental de incalculable valor e o noso compromiso é protexela para as xeracións futuras, garantindo un uso sostible e equilibrado deste espazo”.
O proxecto inclúe a retirada manual de especies invasoras e de residuos sólidos urbanos nunha área de 15.000 metros cadrados na zona supralitoral da praia de Cesantes. Por unha banda eliminaranse da zona dunar e circundantes os exemplares de Artotheca Calendula para restaurar o equilibrio natural e recuperar a biodiversidade local, xa que que está xerando unha perda de espazo para as especies nativas e rompendo a conectividade ecolóxica básica.
Por outro lado, limparase a zona dunar do area de residuos sólidos urbanos que frean os restos de arribazón de algas e outra materia natural necesaria para nutrir a outras especies. Para iso peitearase a zona supramareal para a súa limpeza, contribuíndo así a restaurar a súa funcionalidade ecolóxica e favorecer o uso recreativo, educativo e turístico da contorna. Estes dous labores remataranse en marzo de 2025.
Ao abeiro do proxecto tamén se levará a cabo ata abril de 2025 un inventariado xeral de especies de flora e fauna autóctonas en 80.000 metros cadrados da propia enseada de San Simón, zonas adxacentes á praia de Cesantes, o Paseo da Portela e Punta Socorro. Ademais de na flora, este inventario centrarase en especies de aves observables e naquelas especies de anfibios, réptiles e mamíferos que poden ser observables por persoas usuarias e turistas de forma fácil para a súa posta en valor.
A iniciativa inclúe a creación dunha guía didáctica en formato dixital que permita a divulgación e repercusión do proxecto e o seu impacto entre as e os turistas que visiten o destino, como a posta en valor do espazo natural con vistas á promoción de novos produtos turísticos sostibles.